السبت، أبريل 29، 2006

مطارح


مطرح أول:

القلب العيان
والبيت اللي من جوه
مترّب أوي
مغبّر أوي
و..
مليان خالص بـ(ولا حاجة)دي
طردني
وأديني واقفة قدام الباب
مستنية
.
.
مطرح تاني:

الكلام
اللي أرضيته فرحه
وعواميد نوره حماس
انطفى
..
أي نعم ..من زمان
بس كان فيه رمق
يتحايل
.
.
دلوقت
خلاص
نَفَسه..انقطع
.
.

مطرح رابع:

الطيبة
اللي ماليش غيرها
وماليها غيري
.
.
لوسمحتم
ممكن يعني
من غير تتقيل
تشليوها ويّاكم
حبّة
أصلي تعبت
.
.
وعايزة
أغيّـر
!
.
.
مطرح تالت:

مش عارفة
أصلي نسيته
كان
زمان
في واحد كده..
كل ماحد اتضايق
أو أنا
أروحله..
أجيب من عنده
حاجات حلوة
وأغسل وشي
بنهر محبة
صافي
..
كل ما أعجز
أفرّح حبايبي
أروحله
أعيط على صخرة
طرية
هناك
تمص المية
وتعمل لي من الملح
عرايس بحر
ودلافين
وتيجبلي بطوط
يضحك في وشي
فأنسى
وأرجع لحبايبي
من تاني
صافيـــــــــة
زي مية الجنة
..
.
.
مطرح من غير رقم:

زي كده ماكسرت القافية
وكتبت من غير أدب
أهو المطرح ده مالوش شكل
ولاوصف
ولافيه حبايب
ولا أصدقاء
ولا كلام كبير
ولا صغير
ولا عيوطة واحدة
ولا ضحكاية حتى
يمكن بسمة صغيووورة
بس أصلي عايزة أنااام
ولما أصحى
أقعد لوحدي
لوحدي أوي
ساعتها..يمكن
يمكن يعني
ألاقيني
جوه المطارح
أو حتى.. برّاها

.
.

سلام يابشر

هناك 4 تعليقات:

شايفنكم يقول...

ما قاله قضاة مصر الشرفاء لشايفنكم يوم لجنة الصلاحيه


هشام بسطويسي....قال"الشعب عنده وعي كفايه وفاهم كويس ايه اللي بيحصل و فاهم ان قضية استقلال القضاء و نزاهته تهم كل مواطن.....القضيه مش قضيه قاضيين بيتحاكموا !!"

و قال ايضاً" حشود الامن...جيا تحمي النظام من الشعب"

و قال لنا الخضيري عن حشود الامن الكبيره" الحشد الامني يدل على على ان الدوله لا تفكر بالمنطق المطلوب...و ده لأنها للأسف بتفكر بعضلاتها"

و اضاف" المسأله مش خاصه بالقضاه دي قضية الشعب المصري كله"

و بعد ان تم الاعتداء على محمود حمزه كان لنا معه حوار كامل في مستشفى كليوباترا و هذا اهم ما ورد فيه

قال محمود حمزه لشايفنكم مستنكراً ما تعرض له من اهانات و ضرب" القضاء ده ايه؟ ايه رمزه؟ ..العدل طبعا..و لما يهان العدل بالطريقه دي...مش دي رساله للشعب..رساله بتقول: مش هما دول اللي بتقولوا ان هما صوتكوا" شما اشار الى وجهه المصاب و قال " اهو بالجزمه ...بالجزمه"

قال لنا ايضا محمود حمزه وهو يغالب دموعه.. " انا لما دخلت المستشفى في الطواريء...انكسرت اوي و صعبت نفسي عليا جداً..ولكن بعد ان جاءني تليفون من مواطنه تؤيدني و دعت لي لم اعد اشعر باي الم في جسدي"

و عندما اكد حمزه ان مصر في حاجه لكل شخص و كل وسيله اعلام من اجل تدعيم حركة القضاء سالناه هل اتى لك اي تليفزيون حكومي منذ اصابتك فضحك بمراراه و قال"لم يأتي اي تليفزيون حكومي بل بالعكس دا انا لما شفت التليفزيون المصري لقيت نفسي متهم"
و اضاف"و لما و صفوا اللي قام بالاعتداء ....كان ناقص يقولوا عليه مختل عقلياًًً!!!!!!!!"
و عندما سألناه عن مدى ايمانه باستقلال القضاء...قال" اكيد هيستقل القضاء الرئيس وعد بكده...هل يجوز ان رئيس الجمهوريه وهو اعلى الهيئات القضائيه يوعد ما يوفيش؟؟...مش معقول..انا مش متخيل انه مويفويش بوعده!!!"

و في نهاية حديثه وجه كلامه لرئيس مبارك قائلاً:" قانون السلطه القضائيه مش هيأثر على اي سلطه اخرى..
ارجوك ..ارجوك...انهى الازمه...لن ينهيا غيرك!!!"

Pianist يقول...

حلوة كتبتك بالعامية
وحلوة المطارح
خصوصا المطرح التالت
المطرح اللي من غير رقم مباشر شوية
في رأيي
افضل فصحتك
:)

Mist يقول...

شكرًا جزيلاً على ملاحيظك بيانيست
الحقيقة كنت بس..
بألعب
:)

shaimaa يقول...

ميست هانم ازي حضرتك وازاي الكيمياء علي حسك كده؟

مطرح رابع:

الطيبة
اللي ماليش غيرها
وماليها غيري
.
.
لوسمحتم
ممكن يعني
من غير تتقيل
تشليوها ويّاكم
حبّة
أصلي تعبت
.
.
وعايزة
أغيّـر
!
.

ممكن اقلك ان المطرح دا مطرحي فعلا

لا بجد ومن غير هزار
اول مره اقراء حاجه ليكي عاميه
انتي اتعديتي ولا ايه؟؟