ما قلّ ودلّ..أو لم يـ!ـدل

-عارفة ياسوسّة ده مين
- مين؟

- فنان كبير اسمه (فان جوخ)..عارفه ده بقى قطع ودنه لما حبيبته طلبتها

- ليه؟..هيَّ ماكانش عندها ودان

!

ــــــــــــــــــــــــــــــــــــــــــــــــــــــــــــــ

- من فين الصورة دي؟

- البي بي سي بتقول انها من سجن أبو غريب 

- هوّ الراجل اللي بيتفرج من الشباك ده..كان في السجن

- مش عارفة ..بس ماافتكرش..

- مش هو اللي شخبط يعني على الباب؟

- لا..ياحبيبتي..ده ماكانش بيشخبط..ده كان بيموت

ـــــــــــــــــــــــــــــــــــــــــــــــــــــــــــــ

من سكات..وجوه في الضلمة..باتقسم اتنين..وارفعه وأطخ رصاصة

بتخش جوه..وتتحول لحد ..الحد ده بيقوم شايل الصخرة اللي واقفه في نص الحلق..ويحوش الايد الساقعة أوي اللي بتعصر في القلب..

وكل مسمار مترمي هنا ،وهناك..بيلملمه بسرعة ..

ويقوم خارج من الناحية التانية..رصاصة من تاني

ـــــــــــــــــــــــــــــــــــــــــــــــــــــــــــــــ

- السلم ده..لفوق،ولا لتحت؟

- لتحت

- بص أنا شايفه النور فوق....يبقى لفوق

- بصراحة ..أنا باحب الضلمة

!